Eng National Gedenkminutt fir d’Corona-Doudeger

En ëffentlechen Debat an der Kommissioun war den 22-12-2020 iwwert d'ëffentlech Petitioun Nr. 1698

Validéiert Ënnerschrëften op Pabeier : 2355

Déi ëffentlech Petitioun Nr. 1698 huet den 18-12-2020 de Seuil vu 4500 Ënnerschrëften erreecht

Validéiert elektronesch Ënnerschrëften : 2620

Den Delai fir déi ëffentlech Petitioun Nr. 1698 z'ënnerschreiwen ass den 12-12-2020 ofgelaf - Zuel vun den elektroneschen Ënnerschrëfte virun der Validatioun : 2681

Déi ëffentlech Petitioun Nr. 1698 ka vum 31-10-2020 un ënnerschriwwe ginn

Deklaratioun vun der Recevabilitéit

D'ëffentlech Petitioun Nr. 1698 gouf den 30-10-2020 vun der Presidentekonferenz als recevabel deklaréiert.

Recevabilitéit: recevabel

Ufank vun der Kollekt vun Ënnerschrëften : 31-10-2020 um 0h00

Schluss vun der Kollekt vun Ënnerschrëften : 11-12-2020 um 23h59

Den Avis vun der Petitiounskommissioun vum 28-10-2020 iwwert d'ëffentlech Petitioun Nr. 1698 ass positiv

Avis vun der Petitiounskommissioun: positiv

D'ëffentlech Petitioun Nr. 1698 gouf den 26-10-2020 deposéiert.

Titel vun der Petitioun: Eng National Gedenkminutt fir d’Corona-Doudeger

Zil vun der Petitioun: Eng National Gedenkminutt fir d’Corona-Doudeger zum Joreswiessel den 31.12.20 um 24 hrs - 01.01.2021 Mir wëllen an enger Gedenkminutt um 0:00 de Verstuerwene vun der Covid-19-Pandemie an hiren Hannerbliwwene gedenken. An dëser Gedenkminutt drécke mir eist Matgefill als Persoun, Matbierger.in an als Natioun, andeems mer ënnert der Rou vun der Nuecht eng Minutt laang de Mënsche gedenken, déi duerch de Coronavirus ëm d’Liewe komm sinn. Fir dësem Joreswiessel vum Matgefill ee würdege Kader ze verschafen, soll een op Freedefeier a Knupperten verzichten.

Motivatioun vum generellen Interesse vun der Petitioun: Begrënnung: D’Coronapandemie huet zu Lëtzebuerg 127 Mënschen d’Liewe kascht. Hannert deenen Zuele stieche Mënsche mat Famillen a Frënn. Aus deem Grond wëlle mer solidaresch si mat eise Matmënschen, déi ëm ee schwéiere Verloscht traueren. Mir wëllen eis Matmënschen, déi eng geléifte Persoun duerch de Coronavirus verluer hunn, an hirer Trauer begleeden an net vergiessen! 127 Corona-Doudeger zu Lëtzebuerg gesinn op den éischte Bléck Mol no enger niddreger Doudeszuel aus a sinn et vläicht och am Verglach mat anere Länner op der Welt. Mee fir et an eng Relatioun ze setzen , dat sinn 6 Mol sou vill Doudeger wéi all Joers op eise Stroossen ëm d’Liewe kommen. Dat sollte mir net ignoréieren. An d’Zuelen tréischten och net déi Mënschen doriwwer ewech, déi eng geléifte Persoun verluer hunn. Mir däerfen nämlech och net vergiessen, datt den Doud duerch de Covid-19 een immens einsamen a schrecklechen Doud ass. Dës Patiente si meeschtens an de Spideeler a Fleegeheemer ouni de Bäistand vun hirer Famill a Frënn gestuerwen, ouni kënnen eng leschte Kéier Äddi ze soen. Dëst ass fir déi Hannerbliwwen eng immens péngvoll Situatioun, déi se psychologesch eng laang Zäit wäert begleeden. Grad dëse Leit wëlle mer eist déift Matgefill ausdrécken. De richtegen Zäitpunkt dofir ass an eisen Aen de Joreswiessel, bei deem mer traditiounsgeméiss op dat vergaangent Joer zeréckkucken an hoffnungsvoll op dat neit Joer blécken. Fir dem Joreswiessel vum Matgefill ee würdege Kader ze verschafen, soll een op Freedefeier a Knupperten verzichten. Dëst huet de Virdeel, dass vill Accidenter, kënne vermidde ginn, wouduerch d’Rettungsdéngschter sech op méi wichteg Fäll konzentréiere kéinten. Des Weideren kënnen sech dës Leit och zu deem Moment un der Gedenkminutt bedeelegen. Gläichzäiteg maache mer eppes Guddes fir d’Ëmwelt an d’Gesondheet, well di enorm Quantiéiten un Dreck evitéiert ginn. Wärend enger Silvesternuecht geet d’Feinstaubbelaaschtung normalerweis ëm dat véierzéchfacht an d’Luucht. Och dat géif an enger roueger Silvesternuecht ewechfalen. Och di negative Wierkung vu Knupperten op Haus- a Wëlldéiere géif doduerch entfalen. Duerch Freedefeier geroden d’Déieren nämlech oft a Panik, Hausdéiere lafe fort, wat zu Accidenter féiere kann. Ee Verbuet vun Freedefeiere ass relativ einfach ëmzesetzen. Esou hunn zum Beispill verschidde Gemengen hei am Land schonns di lescht Joren ee generellt Verbuet fir Freedefeier agefouert, wéi zum Beispill, Esch-sur-Alzette an d’Gemengen, Berdorf, Dudelange, Erpeldange, Fischbach, Hobscheid, Kayl, Kehlen, Leudelange, Redange, Sanem, Schifflange, Steinsel an Réimech.